|
Ályktun um
öryggir- og tryggingamál.
Samþykkt á 25. þingi SSÍ sem
haldið var 23. og 24. nóvember 2006.
25. þing SSI þakkar þeim fjölmörgu aðilum sem að
öryggis og björgunarmálum starfa fyrir óeigingjarnt og
gott starf.
Það vekur hinsvegar athygli og beinist að
sjómannastéttinni, verkstjórn og öryggismálum um borð í
íslenskum skipum að á árinu 2005 voru 366 slys á
sjómönnum tilkynnt Tryggingastofnun ríkisins. Enn er
óviðunandi slysatíðni meðal sjómanna þegar til þess er
litið að 21% allra tilkynntra slysa til TR eru slys á
sjómönnum þrátt fyrir að sjómenn séu aðeins 2,6% þeirra
sem á vinnumarkaði starfa. Sé litið til ársins 1995 voru
tilkynnt slys á sjómönnum til TR 459 sem var þá 17%
allra tilkynninga um slys sem stofnuninni bárust, en
sjómenn voru þá 4,5% þeirra sem á vinnumarkaði voru. Sem
sjá má af slysatölum hefur slysatíðnin meðal sjómanna
aukist og telur þing SSI að hér þurfi að bregðast skjótt
við og sporna gegn þessari óheillaþróun.
Nauðsynlegt er að samræma aðgerðir í öryggismálum
sjómanna og gera heildaráætlun í samræmi við markmið um
fækkun sjóslysa.
Í lögum um rannsókn sjóslysa frá árinu 2000 nr. 68
20. maí 5.gr. 2.mgr. segir: Um skráningu sjóslysa sem
verða um borð í íslenskum skipum af hvaða stærð sem er,
svo og skráningu slysa og atvika sem verða á erlendum
skipum sem nefndin tekur til skoðunar, skal sett sérstök
reglugerð.
Reglugerð var gefin út af Samgönguráðuneytinu 24.
janúar 2001 um rannsókn sjóslysa en þar segir í 9.gr.
Tilkynningar um sjóslys. Skipstjóra, eða þeim er kemur í
hans stað, er skylt að tilkynna rannsóknarnefnd sjóslysa
um slys á mönnum sem verða á skipi.
Tilkynningar skulu sendar rannsóknarnefnd sjóslysa
án undandráttar og eigi síðar en innan 7 daga frá því
sjóslys varð á eyðublaði sem rannsóknarnefnd sjóslysa
lætur í té. Tilkynning á rafrænu formi skal metin
jafngild.
Rannsóknarnefnd sjóslysa skal hafa samráð við
slysaskrá Íslands og Tryggingastofnun ríkisins um
móttöku og úrvinnslu tilkynninga sjóslysa þegar slys
hafa orðið á mönnum.
Hér hefur alvarleg brotalöm orðið á, en nákvæm
slysaskráning er stór hluti forvarnastarfs í
öryggismálum sjómanna. Þing SSI hvetur samgönguráðherra
til að fylgja þessum ákvæðum reglugerðarinnar eftir af
fullum þunga.
Í reglugerð um ráðstafanir er stuðla að bættu öryggi
og heilsu starfsmanna um borð í skipum frá 14. desember
1998 með breytingum frá 5. mars 2004 eru engar kröfur
gerðar til manna um þekkingu og stjórnun krana eða
togvinda hvað þá að ætlast sé til kunnáttu þeirra er
gefa stjórnendum fyrrnefndra tækja bendingar um
tilteknar aðgerðir. En þetta atriði er meginorsök slysa
sem verða á sjó. Krana eða lyftara á bryggju má enginn
stjórna nema hafa lokið tilteknu námskeiði á vegum
Vinnueftirlits ríkisins og að geta gefið og skilið
bendingar, t.d. við hífingu. Séu fyrrnefnd tæki flutt um
borð í skip er engrar þekkingar krafist. Þá eru engin
ákvæði um eftirlit með slitálagi víra, burðarþol lása og
keðja, blökkum, tromlum og hvers konar öðrum búnaði sem
notaður er til hífinga.
Þing SSI krefst þess að úr þessu verði tafarlaust
bætt. Á áhættusvæðum um borð í skipum, ofan og neða
þilja, á að merkja á þiljur varúðar viðvaranir vegna
slysahættu. Þingið hvetur samgönguráðherra til þess að
bera saman kröfur Vinnueftirlits ríkisins til þeirra
manna sem vinna á krönum, lyfturum og stjórna hífingum
og hvernig kröfur annarra þátta í öryggismálum við
hverskonar störf í landi eru í samanburði við störf
sjómanna um borð í kaupskipum, olíuskipum og
fiskiskipum. Er það ekki umhugsunarvert hvort sami aðili
eða stofnun sjái um öryggismál til sjós og lands?
25. þing SSÍ væntir þess að stéttarfélög
skipstjórnarmanna hvetji félagsmenn sína til þess að
vera ekki einir í stjórnpalli þá skip er á ferð og
jafnframt að stjórna hífingum veiðafæra.
Um nokkurn tíma hafa aðeins 35% þeirra er skráðir
hafa verið á námskeið Slysavarnarskóla sjómanna mætt til
náms. Það er óviðunandi ástand. Í ljósi margra mánaða
biðlista sjómanna,sífelldra óska um undanþágu og
fyrirhyggjuleysi sjómanna og útgerðarmanna í þessum
mikilvæga hlekk slysavarna sjómanna leggur 25. þing SSÍ
til að 50% námskeiðsgjalds verði óafturkræft
staðfestingargjald við skráningu á þáttöku.
Þá hvetur þing SSI áhafnir skipa til að tilnefna
öryggisfulltrúa um borð. Jafnframt eru stéttarfélög
sjómanna hvött til að fylgja þessu öryggismáli eftir.
Þing SSI væntir þess að samgönguráðherra breyti lögum um
lögskráningu sjómanna í þá veru að allir þeir sem hafa
atvinnu af sjósókn skuli lögskráðir án tillits til
stærðar skips.
Rannsóknarnefnd sjóslysa skal halda sérstaka skrá
yfir hvar slys verða og fjöldi þeirra verði skráður á
viðkomandi skip. Verði tvö slys eða fleiri um borð í
skipi á sama árinu er rannsóknarnefnd sjóslysa skylt að
grípa til sérstakra ráðstafana um borð í viðkomandi
skipi og fara yfir öryggismál skipsins með áhöfn og
fulltrúa útgerðar. Allir þeir sem afla sér menntunar í
skipstjórnar- eða vélfræðum skulu fá markvissa kennslu í
verkstjórn og vinnuhagræðingu og í skýrslugerð vegna
tilkynningar um slys.
Alvarlegir misbrestir í opinberu starfi hafa átt sér
stað hjá nokkrum lögskráningastjórum.
Lögskráningarstjórar og skipstjórnarmenn eiga að sinna
skyldum sínum hvað lögskráningu varðar. Núverandi ástand
er óviðunandi. Þar sem sjómenn hafa verið lögskráðir í
skipsrúm a) án tilskylinna réttinda frá Slysavarnaskóla
sjómanna. b) erlendir ríkisborgarar án kennitölu
Landhelgisgæslan er hvött til þess að fylgja enn fastar
eftir skyndiskoðunum á skipum, búnaði og lögskráningu.
Mikil aukning verður á siglingum stórra gas og
olíuflutningaskipa innan lögsögu Íslands á næstu árum.
25. þing SSI hvetur stjórnvöld til að grípa nú þegar til
aðgerða og lögbinda afmarkaðar siglingaleiðir innan
íslensku efnahagslögsögunnar fyrir þessi skip og önnur
skip sem sigla með hættulega og mengandi farma.
25. þing SSÍ fagnar því að útboð hefur farið fram á
Evrópska efnahagssvæðinu vegna útsendingar hljóð- og
sjónvarpsdagskrár RÚV um gervitungl. Er þess að vænta að
á allra næstu mánuðum verði útsendingar hljóðvarps og
sjónvarps aðgengilegar um allt land, sjómönnum á hafi
úti og Íslendingum erlendis.
Til
baka
|
