|
Ályktun
um skýrslu nefndar á vegum
sjávarútvegsráðherra er hafði það hlutverk að
endurskoða lögin um stjórn fiskveiðanna.
Nýlega skilaði nefnd sú áliti, sem
sjávarútvegsráðherra skipaði til að endurskoða
lög nr. 38/1990, um stjórn fiskveiða. Eins og fram
kemur í inngangi álits meirihluta nefndarinnar var
henni m.a. falið að leggja til breytingar á lögum
nr. 38/1990 er hefðu það markmið að ná sem
víðtækastri sátt landsmanna um
fiskveiðistjórnunarkerfið.
Fundur formanna aðildarfélaga Sjómannasambands
Íslands haldinn á Egilsstöðum 23. - 24. nóvember
2001 telur að meirihluti nefndarinnar hafi með
tillögum sínum að engu haft það markmið sem sett
var heldur þvert á móti munu tillögur meirihlutans,
nái þær fram að ganga, auka enn á það ósætti
sem ríkt hefur um fiskveiðistjórnunarkerfið.
Fundurinn hafnar alfarið hugmyndum meirihluta
nefndarinnar um að lagt verði veiðileyfagjald eða
auðlindaskattur á sjávarútveginn. Ekki verður séð
með hvaða hætti auðlindaskattur á sjávarútveginn
stuðlar að sátt um fiskveiðistjórnunarkerfið.
Aukin skattheimta á útgerðina mun ekki hafa annað í
för með sér en meiri skuldir og hvata til að enn
fleiri selji sínar aflahlutdeildir til betur stæðra
útgerða. Augljóst er, að fenginni reynslu, að
slíkt muni ekki leiða neitt annað af sér en fjölgun
leiguliða eða jafnvel verktöku sem því miður er
þegar farið að bóla á.
Fundur formanna aðildarfélaga Sjómannasambands
Íslands haldinn á Egilsstöðum 23. - 24. nóvember
2001 hafnar alfarið tillögu meirihluta nefndarinnar um
að heimilt verði að framselja aflahlutdeild frá
fiskiskipi til fiskvinnslustöðvar.
Fundur formanna aðildarfélaga Sjómannasambands
Íslands haldinn á Egilsstöðum 23. - 24. nóvember
2001 hafnar alfarið tillögu meirihluta nefndarinnar um
að reglur um hámarksaflahlutdeild fyrirtækja verði
rýmkuð.
Fundur formanna aðildarfélaga Sjómannasambands
Íslands haldinn á Egilsstöðum 23. - 24. nóvember
2001 hafnar alfarið tillögu meirihluta nefndarinnar um
að ákvæði um veiðiskyldu verði færð til fyrra
horfs, þ.e.a.s. að veiða verði aðeins 25%
úthlutaðs aflamarks á tveimur árum í stað 50% eins
og kveðið er á um í núgildandi lögum. Hins vegar
er það krafa fundarins að stjórnvöld fari að opna
augun fyrir því, að eitt af aðal atriðunum í því
að sátt komist á í sjávarútveginum, er að banna
framsal aflamarks. Fundurinn leggur til að einungis
verði leyfð jöfn skipti á aflamarki. Veiðiskylda
verði 100% nema þegar um óviðráðanlegar
aðstæður er að ræða.
Fundur formanna aðildarfélaga Sjómannasambands
Íslands haldinn á Egilsstöðum 23. - 24. nóvember
2001 hafnar alfarið þeirri hugmynd meirihluta
nefndarinnar að þær veiðiheimildir sem úthlutað er
í úthafinu verði framseljanlegar milli skipa sem
skráð eru í mismunandi löndum. Fundurinn bendir á
að með slíkri heimild er einungis verið að finna
leið til þess að útgerðarmenn geti losað sig við
íslenska sjómenn og ráðið til sín vinnuafl frá
þeim löndum þar sem laun eru hvað lægst og
mannréttindi jafnvel fótum troðin. Fundurinn lítur
svo á að ef ofangreindar tillögur meirihluta
nefndarinnar ná fram að ganga sem lög frá Alþingi
sé verið að stofna til meiriháttar átaka við
sjómenn.
Til
baka
|
